اس مقام پر "کاسینو رائل" جیسی مشہور فلمیں بھی شوٹ کی جاچکی ہیں۔
دلکش مقامات پر گزارے گئی تعطیلات کے دوران سیاح عموماً اپنے ساتھ تصاویر سے بھرا فون اور یادگاروں سے سجا سوٹ کیس لاتے ہیں۔ تاہم، کمیونیکیشن کمپنی ItalyComunica نے اٹلی کی مشہور جھیل کومو کی تازہ اور صاف ہوا کو کین میں بند کرکے فروخت کرنا شروع کر دیا ہے، جس کی قیمت 11 ڈالرز فی کین ہے۔
میڈیا رپورٹس کے مطابق، ہر کین میں جھیل کومو سے جمع کی گئی 400 ملی لیٹر 100% تصدیق شدہ تازہ اور قدرتی ہوا موجود ہے۔
جھیل کومو ایک ایسا دلکش مقام ہے جو حالیہ برسوں میں اپنی قدرتی خوبصورتی اور مشہور شخصیات کی رہائش گاہوں کی بدولت سیاحوں میں تیزی سے مقبول ہو چکا ہے۔ یہاں "کاسینو رائل" اور "ہاؤس آف گچی" جیسی مشہور فلمیں بھی شوٹ کی جاچکی ہیں۔
لومبارڈی ٹورازم بیورو کے مطابق، 2023 میں 5.6 ملین سے زائد سیاحوں نے جھیل کومو کا دورہ کیا، اور یہ تعداد مسلسل بڑھتی جا رہی ہے۔
زائرین کی بڑھتی ہوئی تعداد سے فائدہ اٹھانے کے لیے مارکیٹنگ کے ماہر Davide Abagnale نے جھیل کومو کے پوسٹرز فروخت کرنے والی ایک ای کامرس سائٹ قائم کی۔ اس کے علاوہ، اس قدرتی مقام کی تازہ ہوا کو کین میں بند کرکے فروخت کرنا بھی شروع کر دیا گیا ہے۔